مجلة رسالة

اللي نفسهم في مكرونة بشاميل وخايفين يبوظوا الدايت جبتلكم طريقة للبشاميل داااايت

الكمية اللي هقولها لصينية متوسطة

طريقة البشاميل دوبي 4 ملاعق شوفان مطحون ناعم ومعلقة دقيق في 4 اكواب لبن خالي السم علي البارد وحطي معاهم نص مكعب مرقة خضروات ومعلقة صغيرة زبدة سايحة وبعدين حطيه علي النار وقلبيه لحد ما يتقل دا طريقة البشاميل.

واللحمة المفرومة معلقة صغيرة زيت زيتون وتحطي البصلة المقطعة وتقلبيها تدبل وتحطي اللحمة وعليها البهارات ملح وفلفل اسود وزعتر وزودي شوية ميا عشان متتحرقش بس شوية صغيرة يادوب تسويها بعد ما تستوي اطفي عليها

وبعدين ادهني الصينية بنقط زيت بالفرشة وحطي المكرونة اللي سلقتيها وبعدين اللحمة وطبقة مكرونة والبشاميل وبالهنا والشفا .

بس متخلصوش الصينية هيا قطعة وجنبها سلطة وشوربة  ومتنسوش المية قبل الاكل بتساعد علي الشبع .

مكرونة بشاميل

جبتلكم وصفة كريم الزنجبيل للتنحيف وشد الجلد

3 ملاعق كريم جنسون ( مرطب ) + نقطتين ليمون بالظبط + 5 ملاعق كبيرة زيت لوز و 5 ملاعق كبيرة زيت زيتون + ملعقة ماء ورد + قطعة زنجبيل حم وسط مبشور .

الطريقة : قشري الزنجبيل واطحنيه ناعم جدا في المطحنة ودفي زيت الزيتون علي نار هادية متخليهوش يسخن وارفعيه علي طول من

علي النار وبعدين ضيفيه علي الزنجبيل في المطحنة اخلطيهم مع بعض شوية خدي الخليط وصفيه كويس في مصفي الطماطم واللي

يخرج من التصفية اخلطوا عليه باقي المكونات واضربوه تاني في المطحنة ويحفظ في التلاجة ويطلع وقت الاستعمال بس

شد الجسم

بما ان شهر رمضان بيحب الحلويات انا هقولكم علي طريقة كيكة حلوة ودايت

كيكة التفاح والقرفة

المقادير :

بيضة

نص كوب سكر

فانيليا

معلقة كبيرة زبدة زيرو فات او زيت نباتي

هضرب المقادير دي بالمضرب بعدين احط عليهم نص كوب دقيق ونص كوب شوفان مطحون وذرة ملح وربع معلقة صغيرة قرفة ونص معلقة صغيرة بكينج بودر احط الخليط المواد الجافة علي البيض والسكر والفانيليا واضربهم بالمضرب كويس

بعدين نص كوب تفاح مقطع شرايح صغيرة علي الخليط في قالب في الفرن من 15 الي 20 دقيقة تقطع 8 قطع  القطعة = 125 كالوري وبالهنا والشفا

كيكة التفاح

قبل ما اكمل تنزيل باقي الانظمة الغذائية لازم نتكلم عن الرياضة شوية زي ما بيقولوا اجدادنا الحركة بركة هيا فعلا بركة وخير لينا ولصحتنا ولشكلنا

نتكلم عن الرياضة وخصوصا في الشهر الكريم سيبنا من التلفزيون بقي شوية نشوف هنعمل ايه عشان يبقي جسمنا حلو زي الممثلين اللي بيطلعوا بيضيعوا وقتنا وياخدوا ملايين ويفروسونا بجسمهم الرشيق

هنتبع جدول رياضة للناس النشيطة المتحمسة والمسلسلات يا جماعة هتتعاد تاني مية مرة وموجودة علي النت كمان يعني هتروح فين لكن العيد فاضل عليه 20 يوم بسسسس

خطة الرياضة  لشهر رمضان المبارك

اليوم الاول : ربع ساعة مشي وتمارين البطن 15 مرة والصدر 5 مرة والارداف 15 مرة .

اليوم التاني : تلت ساعة مشي تمارين مجمع 15 مرة تمارين دراع 15 مرة وتمارين الرقبة 15 مرة .

اليوم التالت : 25 دقيقة مشي تمارين البطن 20 مرة تمارين الوسط 15 مرة تمارين الفخدين 15 مرة .

اليوم الرابع : نص ساعة مشي تمارين مجمع 20 مرة تمارين دراعين 20 مرة تمارين تمارين الرقبة 20 مرة .

اليوم الخامس : نص ساعة مشي تمارين البطن 25 مرة والصدر 20 مرة والارداف 20 مرة .

اليوم السادس : 35 دقيقة مشي تمارين مجمع 25 مرة تمارين الوسط 20 مرة تمارين الفخدين 20 مرة .

اليوم السابع : 35 دقيقة مشي  تمارين البطن 30 مرة والصدر 25 مرة تمارين دراع 25 مرة .

تقدروا تختاروا الوقت اللي يناسبكم لاداء التمارين لكن المهم يكون قبل الاكل بساعتين او قبل الاكل بساعتين لان الدورة الدموية بتكون مشغولة بهضم الطعام في حالة امتلاء المعدة .

 تابعوني لاضافة المزيد :)

خفض الوزن

رجيم الدكتور ماجد زيتون لتخسيس من 8 إلى 9 كيلو خلال شهر رمضان، ويتميز الرجيم باحتوائه على العديد من العناصر الغذائية، ويجب عليك التنويع بين أنواع الاطعمة الموجودة فى الرجيم من يوم لأخر للحصول على أفضل النتائج.

بما اننا في رمضان  ( كل عام وانتم بخير ) فانا هتكلم معاكم عن افضل الانظمة الغذائية في رمضان كتير مننا جسمهم بيزيد في رمضان بسبب العادات الغذائية الغلط عايزين رمضان دا نكون نزلنا وزننا مش زودناه عشان لبس العيد بقي بلاش فضايح :D

هقولكم بعض النصايح عشان نكون قمرات في لبس العيد :)

ركزوا بقي اهم حاجة وقت الافطار تناول سكريات سهلة الامتصاص في بدابة الافطار لان مستويات السكر في الجسم بتكون في ادني مستوياتها وقت الصيام واجهزة الجسم بتحتاج تعويض نقص السكر باقصي سرعة والسكريات سهلة الامتصاص تعيد مستوي السكر لمعدلاته السابقة ايه بقي السكريات سهلة الامتصاص ( التمر )  سواء كان تمر مع مياه او مع لبن وممكن اي عصير طبيعي لكن من غير سكر وتنتظروا 15 دقيقة لحد ما يمتص الجسم .

بعد كدة السلطة الخضرا لها دور كبير في الرجيم لانها غنية بالالياف اللي بتحفز الجهاز الهضمي بعد الانتخة طول اليوم :D والسلطة بتسهل عملية الهضم وتمنع الامساك وهيا غنية بالفيتامينات والمعادن اللي بيحتاجها جسمنا . 

كدة قولتلكم الاساسيات هنزلكم كام نظام غذائي لشهر رمضان وكل واحد يختار النظام اللي يناسبه والانظمة دي من دكاترة كبيرة متقلقوش اه نسيت اقولكم اني خسيت اكتر من 20 كيلو وعارفة معاناة التخسيس والدايت وحاسة بيكم بس الطريق الطويل بيبدء بخطوة


النظام الاول 

اتفقنا اننا في البداية كوباية تمر بمية وهيا تمرة واحدة او بلبن اوكوباية عصير فريش من غير سكر ( بس انا بصراحة بستعمل سكر دايت في العصاير ماعدا البرتقال من غير سكر او معلقة عسل نحل صغيرة ) المهم نقعد 15 دقيقة نكون صلينا المغرب ونبتدي الفطار

اليوم الاول : الفطار: 2 شريحة لحم مشوي او مسلوق + ثمرة بطاطس مسلوقة + اي كمية من السلطة الخضرا .

بعد 3 ساعات 2 ثمرة فاكهة من الفواكه المسموحة مثل ( تفاح او برتقال او كمتري او جوافة او بطيخ او شمام او كنتالوب او اناناس بس ال 4 دول مش بالثمرة متودوناش في داهية دول بالشريحة )



السحور : نص رغيف بلدي + 2 بيضة مقلية بمعلقة زيت صغيرة + واي كمية سلطة كلوا سلطة براحتكم .

اليوم التاني : الافطار : خضار سوتيه + نص فرخة مشوية او مسلوقة + طبق سلطة كبييير

بعد 3 ساعات كوب زبادي بالفواكة او قطعة كنافة صغيرة او 2 قطايف.

السحور: نص رغيف بلدي + قطعة جبنة قريش او جبنة لايت + ثمرة فاكهة .

اليوم التالت : الافطار اي كمية رز + اي كمية خضار + اي كمية سلطة. مش حرماكم من حاجة 

بعد الافطار ب3 ساعات بولا ايس كريم او كوب صغير قمر الدين .

السحور : نص رغيف + 5 ملاعق فول باليمون ومعلقة صغيرة زيت زيتون + سلطة .


اليوم الرابع : الافطار : سمك او جمبري حد اقصي نص كيلو +  نص رغيف بلدي + اي كمية سلطة .

بعد 3 ساعات قطعة كنافة صغيرة او 2 قطعة قطايف

السحور : اي كمية فاكهة .

اليوم الخامس : الفطار مكرونة مسلوقة بلصلصة (وهقولكم علي طريقتي في المكرونة بتطلع تحفة معلقة زيت زيتون مع بصلة صغيرة بنص فلفل اخضر ومعلقة صلصة معلبة وتزوديها مياه وريحان وكاري وزعتر وملح وفلفل  وتسلفي المكرونة وبعد ما تتسبك الصلصة تحطيها فيها وتقلبي وبس هتطلع تحفة )  + اي كمية سلطة .

بعد 3 ساعات ثمرتين فاكهة او عصير فريش او عصير قمر الدين.

السحور : نص رغيف بلدي + قطعة جبنة قريش + اي كمية سلطة .

اليوم السادس : الافطار : ربع فرخة مشوية او مسلوقة + 5 ملاعق ارز + خضار سوتيه .

بعد الافطار ب3 ساعات 2 قطايف او قطعة كنافة صغيرة.

السحور: ربع رغيف بلدي + 5 ملاعق فول بمعلقة صغيرة زيت زيتون + كوب زبادي لايت.

اليوم السابع : طبق اي يوم من الايام السابقة من الافطار للسحور يعني اختاروا اي يوم يعجبكم من ال6 الايام اللي فاتت.

اليوم التامن : فري كلوا فيه زي مانتوا عايزين بس من غير افراط وخصوصا في الحلويات وفي اليوم التامن هتكونوا من 2 الي 3 كيلو وتقدروا تكرروا الرجيم لحد ما يخلص شهر رمضان :)


استنوني هنزلكم انظمة ونصايح تانية بالتوفيق للجميع

رجيم رمضان